ಆನ್ ಲೈನ್ ದಲ್ಲಿ ಸಹಾಯ ಪಡೆಯುವುದು ಹೇಗೆ?

ಆನ್‌ಲೈನ್ ನಲ್ಲಿ ಸಹಾಯ ಪಡೆಯುವುದು ಹೇಗೆ?

ಸಾಂದರ್ಭಿಕ ಚಿತ್ರ.

ಅದೇನೇ ಸಮಸ್ಯೆ ಅಥವಾ ಸಂಶಯಗಳಿದ್ದರೂ ಮೊದಲು ಗೂಗಲ್‌ನಲ್ಲಿ ಸರ್ಚ್ ಮಾಡಿ ನೋಡುತ್ತೇವೆ. ಅದೇನು ಬೇಕೋ ಎಲ್ಲವೂ ಗೂಗಲ್ ನಲ್ಲಿ ಸಿಗುತ್ತದೆ! ತಲೆ ನೋವಾದರೆ ಏನು ಮಾಡಬೇಕು? ಎಂಬಲ್ಲಿಂದ ಹಿಡಿದು ಶಾಲಾ ಕಾಲೇಜಿನ ಪ್ರಾಜೆಕ್ಟ್ ವರ್ಕ್, ಅಡುಗೆಯಿಂದ ದಾಂಪತ್ಯದವರೆಗೆ ಎಲ್ಲ ರೀತಿಯ ಸಲಹೆ ಸೂಚನೆಗಳಿಗೂ ಆನ್‌ಲೈನ್‌ನ ಮೊರೆ ಹೋಗುವ ಕಾಲವಿದು. ಯಾವುದೇ ರೀತಿಯ ಸಂದೇಹ, ಸಲಹೆಗಳಿಗಾಗಿ ನಾವು ಗೂಗಲ್ ಅಥವಾ ಇನ್ಯಾವುದೇ ಸರ್ಚ್ ಇಂಜಿನ್‌ನ ಮೊರೆ ಹೋದಾಗ ನಮ್ಮ ಕೀವರ್ಡ್‌ಗೆ ಅನುಸಾರವಾಗಿ ಹಲವಾರು ವೆಬ್ ಪುಟಗಳು ತೆರೆದುಕೊಳ್ಳುತ್ತವೆ. ಅವುಗಳಲ್ಲಿ ನಮಗೆ ಅಗತ್ಯವಾದುವುಗಳೂ ಅನಗತ್ಯವಾದ ವಿಷಯಗಳೂ ಇರಬಹುದು. ನಮಗೆ ಯಾವುದು ಬೇಕು ಯಾವುದು ಬೇಡ ಎಂಬ ನಿರ್ಧಾರ ಮಾತ್ರ ನಮ್ಮದೇ. ಹೀಗೆ ಕೀವರ್ಡ್‌ಗಳನ್ನು ಬಳಸಿ ವಿಷಯಗಳ ಬಗ್ಗೆ ಜಾಲಾಡುವುದು ಹೇಗೆ? ಅಥವಾ ನಮಗೆ ಅಗತ್ಯವಾದ ಸಹಾಯಗಳನ್ನು ಪಡೆಯುವುದು ಹೇಗೆ? ಎಂಬುದನ್ನು ನೋಡೋಣ.

ಕೀವರ್ಡ್ ಮುಖ್ಯ
ಅಂತರ್ಜಾಲದಲ್ಲಿ ಯಾವುದೇ ವಿಷಯಗಳನ್ನು ಹುಡುಕಬೇಕಾದರೆ ಕೀವರ್ಡ್ ಮುಖ್ಯ. ಉದಾಹರಣೆಗೆ ಮೊಡವೆ ಹೋಗಲಾಡಿಸಲು ಏನು ಮಾಡಬೇಕು? ಎಂಬುದು ನಿಮ್ಮ ಪ್ರಶ್ನೆಯಾಗಿದ್ದರೆ ಅಲ್ಲಿ ಮೊಡವೆ, ಪರಿಹಾರ ಎಂಬ ಕೀವರ್ಡ್ ಗಳನ್ನು ಬಳಸಬೇಕು. ಸರ್ಚ್ ಬಾರ್ ನಲ್ಲಿ ಒಂದಿಡೀ ಪ್ರಶ್ನೆಯನ್ನು ಟೈಪ್ ಮಾಡುವ ಬದಲು ಅದರಲ್ಲಿರುವ ಪ್ರಮುಖ ಕೀವರ್ಡ್‌ಗಳನ್ನು ಮಾತ್ರ ಸರ್ಚ್ ಮಾಡಬೇಕು.  ನಾವು ಟೈಪ್ ಮಾಡಿದ ಪದದಲ್ಲಿ ಅಕ್ಷರ ತಪ್ಪು (ಸ್ಪೆಲ್ ಮಿಸ್ಟೇಕ್) ಇದ್ದರೆ ಗೂಗಲ್ ಸರಿಯಾದ ಪದವನ್ನು ನಮಗೆ ಸಜೆಸ್ಟ್ ಮಾಡುತ್ತದೆ. ಕೆಲವೊಂದು ಪದಗಳು ಒಂದೇ ಒಂದು ಸ್ಪೆಲ್ಲಿಂಗ್ ನಿಂದ ಬೇರೆ ಅರ್ಥವನ್ನು ನೀಡುವಂತವುಗಳಿರುತ್ತವೆ. ಅಂಥಾ ಪದಗಳಿದ್ದರೆ ಅವುಗಳ ಅರ್ಥವನ್ನು ಗ್ರಹಿಸಿದ ನಂತರ ವಿಷಯದ ಹುಡುಕಾಟ ನಡೆಸಬೇಕು.

ಆನ್‌ಲೈನ್ ಸಹಾಯ ಬಯಸುವವರಲ್ಲಿ ಯುವ ಜನರೇ ಹೆಚ್ಚು!
ಸಮೀಕ್ಷೆಯೊಂದರ ಪ್ರಕಾರ ಹದಿಹರೆಯದ ಮಂದಿಯೇ ಸಹಾಯಕಕ್ಕಾಗಿ ಆನ್‌ಲೈನ್‌ನ ಮೊರೆಹೋಗುತ್ತಾರೆ. ಹದಿಹರೆಯದವರಲ್ಲಿ ಶೇ. 57ರಷ್ಟು ಜನ ತಮ್ಮ ಸಮಸ್ಯೆಗಳಿಗೆ ಸಾಮಾಜಿಕ ತಾಣದಲ್ಲಿ ಪರಿಹಾರವನ್ನು ಹುಡುಕುತ್ತಾರೆ ಅಂತಿದೆ ಸಮೀಕ್ಷೆ. ಕೆಲವೊಂದು ವಿಷಯಗಳನ್ನು ಹೆತ್ತವರಲ್ಲಿ ಅಥವಾ ಶಿಕ್ಷಕರಲ್ಲಿ ಕೇಳಲು ಮುಜುಗರವೆನಿಸಿದಾಗ, ಇನ್ನೂ ಕೆಲವು ವಿಷಯಗಳ ಬಗ್ಗೆ ವಯೋಸಹಜ ಕುತೂಹಲ ಹುಟ್ಟಿದಾಗ ಹದಿಹರೆಯದವರು ಆನ್‌ಲೈನ್‌ನಲ್ಲಿ ಹುಡುಕಾಟ ನಡೆಸುತ್ತಾರೆ ಎಂದು ಸಮೀಕ್ಷೆಯಲ್ಲಿ ಹೇಳಲಾಗಿದೆ.

ಆರೋಗ್ಯದ ಬಗ್ಗೆಯೇ ಹುಡುಕಾಟ ಜಾಸ್ತಿ!
ಪುಟ್ಟದೊಂದು ತಲೆನೋವು ಬಂದರೆ ಸಾಕು, ಯಾವೆಲ್ಲಾ ಕಾರಣದಿಂದ ತಲೆ ನೋವು ಬರುತ್ತದೆ, ನನಗೆ ಯಾಕೆ ಬಂತು? ಆ ನೋವು ಇನ್ಯಾವುದಾದರೂ ರೋಗದ ಮುನ್ಸೂಚನೆಯೇ? ಎಂದು ಗಾಬರಿ ಪಡುವವರಿದ್ದಾರೆ. ಇಂಥವರು ತಲೆನೋವಿನ ಬಗ್ಗೆ ಸಿಕ್ಕಾಪಟ್ಟೆ ಹುಡುಕಾಟ ನಡೆಸಿ ಕೊನೆಗೆ ತಮ್ಮದೇ ಆದ ನಿರ್ಧಾರಕ್ಕೆ ಬಂದು ಇನ್ನೇನೋ ಎಡವಟ್ಟುಗಳನ್ನು ಮಾಡಿಕೊಳ್ಳುತ್ತಾರೆ. ರೋಗದ ಬಗ್ಗೆ ಮಾಹಿತಿ, ಕಾರಣಗಳನ್ನು ಹುಡುಕುವ ಜತೆಗೆ ಸ್ವಯಂ ಚಿಕಿತ್ಸೆಗೂ ಮುಂದಾಗಿ ಪ್ರಾಣಕ್ಕೇ ಹಾನಿ ಮಾಡಿಕೊಳ್ಳುವವರೂ ಇದ್ದಾರೆ. ಅಷ್ಟೇ ಅಲ್ಲದೆ ತನ್ನಂತೆಯೇ ಸಮಸ್ಯೆಗೊಳಗಾಗಿರುವ ವ್ಯಕ್ತಿಯ ಅನುಭವಗಳು ಅಲ್ಲಿ ದಾಖಲಾಗಿದ್ದರೆ ಅವುಗಳನ್ನು ಓದುವುದಕ್ಕೆ ಹೆಚ್ಚಿನ ಆಸಕ್ತಿ ವಹಿಸುತ್ತಾರೆ. ಮಾನಸಿಕ ಸಮಸ್ಯೆಗಳ ಬಗ್ಗೆಯೇ ಹೆಚ್ಚಿನ ಹುಡುಕಾಟಗಳು ನಡೆಯುತ್ತಿದ್ದು, ಜನರು ಪಾಸಿಟಿವ್ ವಿಷಯಗಳಿಗಿಂತ ಹೆಚ್ಚು ನೆಗೆಟಿವ್ ವಿಷಯಗಳಿಗೆ ಆಕರ್ಷಿತರಾಗಿ ಮಾನಸಿಕ ಸ್ವಾಸ್ಥ್ಯವನ್ನು ಕಳೆದುಕೊಳ್ಳುತ್ತಾರೆ ಅಂತಾರೆ ತಜ್ಞರು.

ಲೈಂಗಿಕ ವಿಷಯಗಳ ಬಗ್ಗೆ ಕುತೂಹಲ ಜಾಸ್ತಿ
ದೈಹಿಕ ಮತ್ತು ಲೈಂಗಿಕ ವಿಷಯಗಳ ಬಗ್ಗೆ ಇರುವ ಕುತೂಹಲದಿಂದಲೇ ಇಲ್ಲಿ ಆ ವಿಷಯಗಳ ಬಗ್ಗೆ ಹೆಚ್ಚು ಹುಡುಕಾಟ ನಡೆಯುತ್ತದೆ. ಲೈಂಗಿಕ ಆಸಕ್ತಿ, ಸಮಸ್ಯೆ, ಸಾಮರ್ಥ್ಯದಿಂದ ಹಿಡಿದು ಅನುಭವಗಳ ಬಗ್ಗೆ ಇಲ್ಲಿ ಮಾಹಿತಿ ದೊರೆಯುವುದಲ್ಲದೆ, ಅದರ ಬಗೆಗಿನ ಚರ್ಚೆಗಳೂ ನಡೆಯುತ್ತವೆ. ಸೆಕ್ಸ್, ವಿರುದ್ಧ ಲಿಂಗಗಳ ಬಗೆಗಿನ ಆಕರ್ಷಣೆ ಮತ್ತು ಕುತೂಹಲಕ್ಕೆ ಸಂಬಂಧಿಸಿದ ವಿಷಯಗಳ ಬಗ್ಗೆ ಯುವಜನಾಂಗ ಹೆಚ್ಚು ಆಸಕ್ತಿ ವಹಿಸಿ ಮಾಹಿತಿಗಳನ್ನು ಕಲೆ ಹಾಕುತ್ತಾರೆ. ಇಂಥಾ ಹುಡುಕಾಟಗಳಲ್ಲಿ ಸಿಕ್ಕ ಮಾಹಿತಿಯನ್ನು ಬಳಸಿ ತಪ್ಪು ಹಾದಿ ಹಿಡಿಯುವವರ ಸಂಖ್ಯೆಯೂ ಕಮ್ಮಿ ಇಲ್ಲ. ಆನ್‌ಲೈನ್ ನಲ್ಲಿ ಹೇಳುವ ಮತ್ತು ತೋರಿಸುವ ಎಲ್ಲ ವಿಷಯಗಳನ್ನು ಅದೇ ರೀತಿಯಲ್ಲಿ ಅನುಷ್ಠಾನಗೊಳಿಸುವವರೂ ಇದ್ದಾರೆ. ಆದರೆ ನೆನಪಿಡಿ, ಅಲ್ಲಿ ತೋರಿಸುವ ಕೆಲವೊಂದು ವಿಷಯಗಳಲ್ಲಿ ರೋಚಕತೆ ತುಂಬಲು ಮತ್ತು ಜನರನ್ನು ಆಕರ್ಷಿಸುವುದಕ್ಕಾಗಿ ‘ಕ್ಯಾಮೆರಾ ವರ್ಕ್‌’ಗಳನ್ನು ಮಾಡಲಾಗುತ್ತದೆ. ಇಂಥಾ ಸೋಗಿನ  ಮಾಯೆ ಮತ್ತು ವಾಸ್ತವದ ಬಗೆಗಿನ ಅಂತರವನ್ನು ಅರ್ಥ ಮಾಡಿಕೊಳ್ಳಿ.

ಸಮಾನ ಮನಸ್ಕರ ವೇದಿಕೆ
ಆನ್‌ಲೈನ್‌ನಲ್ಲಿ ಹಲವಾರು ವೇದಿಕೆ ( ಫೋರಂ)ಗಳಿವೆ.  ಈ ವೇದಿಕೆಗಳಲ್ಲಿ ಸಮಾನ ಮನಸ್ಕರ ಜತೆ ಸಂವಹನ ನಡೆಸುವ ಮೂಲಕ ಕೆಲವೊಂದು ಸಂದೇಹ ಮತ್ತು ಸಮಸ್ಯೆಗಳಿಗೆ ಪರಿಹಾರವನ್ನು ಕಂಡುಕೊಳ್ಳಬಹುದು. ಇಂಥಾ ವೇದಿಕೆಗಳನ್ನು ಆಯ್ಕೆ ಮಾಡುವಾಗಲೂ ಹೆಚ್ಚಿನ ಜಾಗ್ರತೆ ವಹಿಸಬೇಕು. ಆನ್‌ಲೈನ್‌ನಲ್ಲಿ ವ್ಯಕ್ತಿಗಳು ಮುಖಾಮುಖಿಯಾಗದೇ ಇದ್ದರೂ ಕೆಲವೊಂದು ಮೋಸದಾಟಗಳು ಇಲ್ಲಿಯೂ ನಡೆಯುತ್ತವೆ. ಇಂಥಾ ವೇದಿಕೆಗಳಲ್ಲಿ ಯಾವ ವಿಷಯವನ್ನು ಹಂಚಿಕೊಳ್ಳಬೇಕು, ಯಾವುದನ್ನು ಹಂಚಿಕೊಳ್ಳಬಾರದು ಎಂಬುದರ ಬಗ್ಗೆ ಸರಿಯಾದ ತಿಳುವಳಿಕೆ ಇರಬೇಕು. ಪ್ರತಿಯೊಬ್ಬ ವ್ಯಕ್ತಿಯನ್ನೂ ಕಣ್ಣು ಮುಚ್ಚಿ ನಂಬುವ ನಿಲುವುಗಳಂತೂ ಬೇಡವೇ ಬೇಡ.
ಇನ್ನು ಆಯಾ ಭಾಷೆಗಳಿಗೆ, ಪ್ರದೇಶದ ಜನರಿಗಾಗಿಯೂ ಹಲವಾರು ವೇದಿಕೆಗಳು ಇದ್ದೇ ಇರುತ್ತವೆ. ಅಂಗವೈಕಲ್ಯತೆ ಇರುವವರಿಗೂ ಅವರದ್ದೇ ಆದ ಆನ್‌ಲೈನ್ ಸಮುದಾಯಗಳು ಇಲ್ಲಿವೆ. ಯಾವುದೇ ಸಮುದಾಯದಲ್ಲಿ ತೊಡಗಿಸಿಕೊಳ್ಳುವ ಮುನ್ನ ಆ ಸಮುದಾಯದ ಬಗ್ಗೆ ಕೂಲಂಕಷವಾಗಿ ತಿಳಿದುಕೊಂಡು, ಅದು ಸೇಫ್ ಆಗಿದೆ..ಇದರಿಂದ ನಮಗೆ ಪ್ರಯೋಜನವುಂಟಾಗಬಹುದು ಎಂಬುದನ್ನು ಅರಿತ ನಂತರವೇ ಆ ಸಮುದಾಯ ಅಥವಾ ವೇದಿಕೆಗಳಲ್ಲಿ ತೊಡಗಿಸಿಕೊಳ್ಳಿ.
ಸಾಮಾಜಿಕ ತಾಣಗಳು ಸಕ್ರಿಯವಾಗಿರುವ ಈ ಕಾಲಘಟ್ಟದಲ್ಲಿ ಸಾಮಾಜಿಕ ತಾಣಗಳಲ್ಲೇ ಇಂಥಾ ವೇದಿಕೆಗಳು ಸಾಕಷ್ಟು ಇವೆ. ಇಲ್ಲಿಯೂ ನಮಗೆ ಆಸಕ್ತಿಯಿರುವ ವಿಷಯಗಳ ಗುಂಪು ಅಥವಾ ವೇದಿಕೆಯಲ್ಲಿ ತೊಡಗಿಸಿಕೊಳ್ಳುವ ಮೂಲಕ ನಮ್ಮ  ಜ್ಞಾನ ಮತ್ತು ಕಲಿಕೆಯ ವ್ಯಾಪ್ತಿಯನ್ನು ಹೆಚ್ಚಿಸಿಕೊಳ್ಳಬಹುದು.
-ರಶ್ಮಿ ಕಾಸರಗೋಡು.

Leap year

ಅಧಿಕ ವರ್ಷದ ಕುರಿತು ಮಾಹಿತಿ
***********************
2016ರನ್ನು ಅಧಿಕ ವರ್ಷ/ಲೀಪ್‌ ಇಯರ್‌ ಅಂದರೆ ಈ ಬಾರಿ “ಫೆ.29′ ತಾರೀಕಿನ ಮೂಲಕ ಹೆಚ್ಚುವರಿ ದಿನವೊಂದು ಸೇರ್ಪಡೆಯಾಗಿದೆ. ಗ್ರೆಗೊರಿಯನ್‌ ಕ್ಯಾಲೆಂಡರ್‌ನಲ್ಲಿ ಲೆಕ್ಕಾಚಾರ ಸರಿದೂಗಿಸಲು ಈ ಅಧಿಕ ವರ್ಷವನ್ನು ಗುರುತಿಸಲಾಗುತ್ತದೆ. ಸಾಮಾನ್ಯವಾಗಿ ನಾಲ್ಕು ವರ್ಷಗಳಿಗೊಮ್ಮೆ ಇದನ್ನು ಗುರುತಿಸುವ ಪದ್ಧತಿ ಇದೆ. ಈ ಹಿನ್ನೆಲೆಯಲ್ಲಿ ಅಧಿಕ ವರ್ಷ ಎಂದರೇನು? ಅದಕ್ಕೇಕೆ ಮಹತ್ವವಿದೆ? ಫೆಬ್ರವರಿಯಲ್ಲಿ ತಿಂಗಳಲ್ಲೇಕೆ ಒಂದು ಹೆಚ್ಚು ದಿನ ಸೇರಿಸುತ್ತಾರೆ? ಇತ್ಯಾದಿಗಳ ಕುರಿತ ಮಾಹಿತಿಗಳು ಇಲ್ಲಿವೆ.

ಏನಿದು ಅಧಿಕ ವರ್ಷ?
ಜಗತ್ತಿನಲ್ಲಿ ಇದೀಗ ಸಾಮಾನ್ಯವಾಗಿ ಬಳಕೆಯಲ್ಲಿರುವುದು ಗ್ರೆಗೊರಿಯನ್‌ ಕ್ಯಾಲೆಂಡರ್‌. ಸೌರ ವರ್ಷದ ಲೆಕ್ಕಾಚಾರವನ್ನು ಸರಿಪಡಿಸಲು ಈ ಅಧಿಕ ವರ್ಷವನ್ನು ಗುರುತಿಸಲಾಗುತ್ತದೆ. ಸಾಮಾನ್ಯವಾಗಿ ವರ್ಷಕ್ಕೆ 365 ದಿನಗಳಿದ್ದರೆ, ಅಧಿಕ ವರ್ಷದ ಸಂದರ್ಭ ಒಂದು ದಿನವನ್ನು ಹೆಚ್ಚಿಗೆ ಅಂದರೆ 366 ದಿನಗಳನ್ನಾಗಿ ಲೆಕ್ಕ ಹಿಡಿಯಲಾಗುತ್ತದೆ. ಈ ಮೂಲಕ ಲೆಕ್ಕಾಚಾರ ಸರಿದೂಗಿಸಲಾಗುತ್ತದೆ. ಹೆಚ್ಚುವರಿ ದಿನವನ್ನು ಫೆ.29 ಆಗಿ ಗುರುತಿಸಲಾಗುತ್ತದೆ. ಸಾಮಾನ್ಯವಾಗಿ ಫೆಬ್ರವರಿ ತಿಂಗಳಲ್ಲಿ 28 ದಿನಗಳೇ ಇದ್ದರೂ, ಅಧಿಕ ವರ್ಷದ ಸಂದರ್ಭದಲ್ಲಿ ಫೆ.29 ಇರುತ್ತೆ¨

ಅಧಿಕ ವರ್ಷ ಲೆಕ್ಕ ಯಾಕೆ ಬೇಕು?
ಸೂರ್ಯನ ಸುತ್ತ ಸುತ್ತಲು ತೆಗೆದುಕೊಳ್ಳುವ ಅವಧಿಯನ್ನು ಸೌರ ವರ್ಷ ಎನ್ನುತ್ತಾರೆ. ಗ್ರೆಗೊರಿಯನ್‌ ಕ್ಯಾಲೆಂಡರ್‌ ಪದ್ಧತಿಯಲ್ಲಿ ಒಂದು ವರ್ಷಕ್ಕೆ 365 ದಿನ ಎಂದು ಗುರುತಿಸಲಾಗುತ್ತದೆ. ಆದರೆ ಸೂರ್ಯನ ಸುತ್ತ ಸುತ್ತಲು ಭೂಮಿ ತೆಗೆದುಕೊಳ್ಳುವ ಅವಧಿ 365 ದಿನ, 5 ಗಂಟೆ, 48 ನಿಮಿಷ ಮತ್ತು 46 ಸೆಕೆಂಡ್‌ಗಳು. ಇದನ್ನು ಟ್ರೋಫಿಕಲ್‌ ಇಯರ್‌ ಅಥವಾ ಉಷ್ಣವಲಯದ ವರ್ಷ ಎಂದೂ ವೈಜ್ಞಾನಿಕವಾಗಿ ಹೇಳುತ್ತಾರೆ. ಗ್ರೆಗೊರಿಯನ್‌ ಕ್ಯಾಲೆಂಡರ್‌ನಲ್ಲಿ 365 ದಿನಗಳು ಮಾತ್ರವೇ ಇರುವುದರಿಂದ ಪ್ರತಿ ವರ್ಷವೂ ಹೆಚ್ಚುವರಿಯಾಗಿ 5 ಗಂಟೆ, 48 ನಿಮಿಷ, 46 ಸೆಕೆಂಡ್‌ಗಳು ಉಳಿಯುತ್ತವೆ. ಇದನ್ನು ಒಟ್ಟಾಗಿಸಿ, ಒಂದು ದಿನವಾಗಿ ಅಧಿಕ ವರ್ಷದಲ್ಲಿ ಗುರುತಿಸಲಾಗುತ್ತದೆ. ಫೆಬ್ರವರಿಯಲ್ಲಿ 28ಕ್ಕೆ ಒಂದು ಹೆಚ್ಚು ಅಂದರೆ ಫೆಬ್ರವರಿಯಲ್ಲಿ 29 ಆಗಿ ಇದನ್ನು ಸೇರಿಸಲಾಗುತ್ತದೆ. ಈ ಮೂಲಕ ಸೌರ ವರ್ಷದ ಲೆಕ್ಕಾಚಾರವನ್ನು ಸರಿದೂಗಿಸಲಾಗುತ್ತದೆ. 1582ರಲ್ಲಿ ಈ ಮಾದರಿಯ ಲೆಕ್ಕಾಚಾರವನ್ನು ತರಲಾಯಿತು.

ಅಧಿಕ ವರ್ಷ ಲೆಕ್ಕಾಚಾರವಿಲ್ಲದಿದ್ದರೆ ಏನಾಗುತ್ತೆ?
ಋತುಗಳು ಮತ್ತು ಖಗೋಳ ಘಟನೆಗಳು ಪ್ರತಿ ವರ್ಷ ಇಂತಹುದೇ ದಿನದಂದು ಪುನರಾವರ್ತನೆಯಾಗುವುದಿಲ್ಲ. ಅವುಗಳು ಬದಲಾಗುತ್ತಿರುತ್ತವೆ. ನಿರ್ದಿಷ್ಟ ದಿನಗಳುಳ್ಳ ಕ್ಯಾಲೆಂಡರ್‌ ಆಗ ಇದನ್ನು ತೋರಿಸುವುದಲ್ಲಿ ಲೆಕ್ಕ ತಪ್ಪುತ್ತದೆ. ಇದನ್ನು ಸರಿದೂಗಿಸಲು ಗ್ರೆಗೊರಿಯನ್‌ ಕ್ಯಾಲೆಂಡರ್‌ನಲ್ಲಿ ನಿರ್ದಿಷ್ಟವಾಗಿ ಒಂದು ದಿನವನ್ನು ಸೇರಿಸಲಾಗುತ್ತದೆ. ಇದರಿಂದ ಲೆಕ್ಕಾಚಾರ ಸರಿಪಡಿಸಬಹುದು. ಗ್ರೆಗೊರಿಯನ್‌ ಕ್ಯಾಲೆಂಡರ್‌ನಲ್ಲಿ ಒಂದು ವೇಳೆ ಹೆಚ್ಚುವರಿ ದಿನವನ್ನು ನಾಲ್ಕು ವರ್ಷಗಳಿಗೊಮ್ಮೆ ಸೇರಿಸದೇ ಇದ್ದಲ್ಲಿ ಸುಮಾರು 6
ಗಂಟೆಗಳನ್ನು ನಾವು ಪ್ರತಿ ವರ್ಷ ಕಳೆದುಕೊಳ್ಳುತ್ತೇವೆ. ಒಂದು ಶತಮಾನದಲ್ಲಿ 24 ದಿನಗಳು

ಕಡಿಮೆಯಾಗುತ್ತದೆ. ಇನ್ನು, ಸಾಮಾನ್ಯವಾಗಿ “ಫೆ.29′ ಇಲ್ಲದ ವರ್ಷಗಳನ್ನು ಸಾಮಾನ್ಯ ವರ್ಷ ಎಂದು ಹೇಳಲಾಗುತ್ತದೆ.

ಈ ಕ್ರಮ ತಂದಿದ್ದು ಯಾರು?
ರೋಮ್‌ ಸಾಮ್ರಾಜ್ಯದ ಚಕ್ರವರ್ತಿ ರೋಮನ್‌ ಜ್ಯೂಲಿಯಸ್‌ ಸೀಸರ್‌ ಸುಮಾರು 2000 ವರ್ಷಗಳ ಮೊದಲು ಜಾರಿಗೆ ತಂದ. ಆದರೆ ಜ್ಯೂಲಿಯನ್‌ ಕ್ಯಾಲೆಂಡರ್‌ನಲ್ಲಿ ಒಂದೇ ನಿಯಮಾವಳಿ ಇತ್ತು ಅದೆಂದರೆ, 4ರಿಂದ ಭಾಗಿಸಬಹುದಾದ ವರ್ಷ ಅಧಿಕ ವರ್ಷ ಎಂಬುದಾಗಿ. ಆದರೆ ಇದರಿಂದ ಹಲವು ಅಧಿಕ ವರ್ಷವಾಗಿ ಲೆಕ್ಕಾಚಾರ ಸರಿಯಾಗಲಿಲ್ಲ. ಕೊನೆಗೆ 1500ರ ದಶಕದಲ್ಲಿ ಗ್ರೆಗೊರಿಯನ್‌ ಕ್ಯಾಲೆಂಡರ್‌ ಬರುವ ಮೂಲಕ
ಈ ಲೆಕ್ಕಾಚಾರ ಸರಿಪಡಿಸಲಾಯಿತು.

ಫೆ.29ರಂದು ಹುಟ್ಟಿದವರ ಕತೆ ಏನು?
ನಮ್ಮಲ್ಲಿ ಕೆಲವರು ಫೆ.29ರಂದು ಹುಟ್ಟಿದ್ದಾರೆ. ಪಾರ್ಟಿ ಕೊಡ್ಸಿ ಅಂದಾಗೆಲ್ಲ ಅವರು ಫೆ.29 ಬರೋದು ನಾಲ್ಕು ವರ್ಷಕ್ಕೊಮ್ಮೆ. ಆಗಲೇ ಪಾರ್ಟಿ ಎಂದು ತಮಾಷೆಯಾಗಿ ಹೇಳುವುದಿದೆ. ಅಂದರೆ ಫೆ.29 ಬರಲು ಕಾಯ್ದು ಆಗಲೇ ಬರ್ತ್‌ಡೇ ಆಚರಣೆ ಮಾಡುತ್ತಾರೆ ಎಂದೇನಿಲ್ಲ. ಸಾಮಾನ್ಯವಾಗಿ ಫೆ.29ರಂದು ಹುಟ್ಟಿದ ದಿನವಾಗಿದ್ದರೆ, ಅಂತಹವರು ಫೆ.28ರಂದೋ ಅಥವಾ ಮಾ.1ರಂದೋ ತಮ್ಮ ಹುಟ್ಟಿದ ಹಬ್ಬ ಆಚರಿಸುತ್ತಾರೆ. ಅಧಿಕ ವರ್ಷದಂದು ಜನಿಸಿದವರನ್ನು “ಲೀಪರ್’ ಎಂದು ಕರೆಯುತ್ತಾರೆ.

ಅಧಿಕ ವರ್ಷ ಗುರುತಿಸುವುದು ಹೇಗೆ?
ಅಧಿಕ ವರ್ಷ ಪರಿಗಣನೆಯಲ್ಲೂ ಒಂದು ಲೆಕ್ಕಾಚಾರವಿದೆ. ಇದರ ಕರಾರುವಕ್ಕು ಲೆಕ್ಕಾಚಾರಕ್ಕಾಗಿ 4 ವರ್ಷಕ್ಕೊಮ್ಮೆ ಅಧಿಕ ವರ್ಷ ಎಂಬುದರ ಬದಲಿಗೆ ಪ್ರತಿ 400 ವರ್ಷಗಳಲ್ಲಿ 97 ಅಧಿಕ ದಿನವಿರುವ ವರ್ಷಗಳನ್ನು ಗುರುತಿಸಲಾಗಿದೆ. ಅಂದರೆ ಒಂದು ಹೆಚ್ಚಿನ ದಿನ ಹೊಂದಿದ ವರ್ಷ 4ರಿಂದ ಭಾಗವಾಗಬೇಕು. 100ರಿಂದ ಭಾಗಿಸಲ್ಪಡುವ ವರ್ಷಗಳೆಲ್ಲವೂ 400ರಿಂದಲೂ ಭಾಗಿಸಲ್ಪಟ್ಟಾಗ ಮಾತ್ರ ಅಧಿಕ ವರ್ಷಗಳು. 1600 ,2000 ಮತ್ತು 2400 ಅಧಿಕ ವರ್ಷಗಳೆನಿಸಿಕೊಂಡರೆ, 1700,1800,1900 ಹಾಗೂ 2100 ವರ್ಷಗಳು ಅಧಿಕವರ್ಷಗಳಾಗುವುದಿಲ್ಲ.

# ಪ್ರತೀ ವರ್ಷದಲ್ಲಿ 365.242 ದಿನಗಳಿರುತ್ತವೆ. ಆದರೆ ಇದನ್ನು ನಾವು ರೌಂಡ್ ಫಿಗರ್ ಮಾಡಿ 365.25 ಎಂದು ಪರಿಗಣಿಸಿ ಅಧಿಕ ವರ್ಷ ನಿರ್ಧರಿಸಿದೆವು.

ಆದರೆ, ಅಳತೆಯಲ್ಲಿನ ಈ ಬದಲಾವಣೆಯಿಂದ ಭೂಮಿಯ ಪಯಣದ 11 ನಿಮಿಷ ವ್ಯತ್ಯಾಸವನ್ನು ನಾವು ಕಡೆಗಣಿಸಿದಂತಾಗುತ್ತದೆ. ಅದೇ ಕಾರಣಕ್ಕೆ ಪ್ರತಿ 400 ವರ್ಷಗಳಲ್ಲಿ ಮೂರು ಸಲ ಅಧಿಕ ವರ್ಷವನ್ನು ಬಿಡಲಾಗುತ್ತದೆ.

ಹೀಗಾಗಿ 100ರಿಂದ ಭಾಗವಾಗುವ ವರ್ಷಗಳಲ್ಲಿನವು 400ವರ್ಷದಿಂದಲೂ ಭಾಗವಾದರೆ ಅದೂ ಅಧಿಕವರ್ಷ.

ಉಳಿದಂತೆ 100ರಿಂದ ಭಾಗವಾಗುವವು ಅಧಿಕವರ್ಷಗಳಲ್ಲ.

@ ಪೋತರಾಜ ಪೋತರದ.